منذ 10 سنوات ......
_______________
طفل 1
انتهى " محمد " الصبي الصغير الذي لم تتجاوز سنوات عمره أصابع اليدين وإلتفت حوله بحثاً عن إمام المسجد ليسأله عن بعض أمور دينه حتى وجده جالساً في المحراب يختتم صلاته بالتسبيح ، ذهب إليه بحماسه وكله أمل في أن يتعلم ما هو جديد لعله يصبح كإمام هذا المسجد في الورع والتقى وحدث هذا الحوار :
________________________
محمد : عمو الشيخ عمو الشيخ ، ممكن أسألك حاجه ؟

الشيخ : إسأل ياحبيبي

محمد : هو أنا لو شوفت واحد صاحبي مسيحي وعيان ينفع أزوره ؟
ولو هو في مشكله ينفع أقف جنبه وأساعده ؟
وينفع أعزمه عندنا وهو يعزمني ؟ ولا حرام عشان هم مسيحيين ؟

الشيخ : أنا مندهش إن فيه ناس قدرت تسيطر عليك وتقنعك إن فيه حاجه إسمها مسيحيين أصلاً ( بيحسسه بالمؤامرة ) دول إسمهم كفاااااااااااااار
ربنا بيقول : لقد كفر الذين قالوا إن الله هو المسيح إبن مريم
لقد كفر الذين قالوا إن الله ثالث ثلاثه
وكمان مهما حاولت تعمل مش هترضيهم ، ولن ترضى عنك اليهود ولا النصارى حتى تتبع ملتهم
عايز تكون كافر زيهم ؟؟؟؟؟
الطفل الصغير أصابه الرعب مما سمع وأحس إنه في مؤامره خبيثه لجعله يترك دينه وأصبح قلبه مشبع بالكراهيه تجاه كل ما هو غير إسلامي ، ووجد في هذا الشيخ البطل المغوار الذي أنقذه من براثن الكفار وجعله قدوه له !!!!!
____________________________________
طفل 2
انتهى " عمر " الصبي الصغير الذي لم تتجاوز سنوات عمره أصابع اليدين وإلتفت حوله بحثاً عن إمام المسجد ليسأله عن بعض أمور دينه حتى وجده جالساً في المحراب يختتم صلاته بالتسبيح ، ذهب إليه بحماسه وكله أمل في أن يتعلم ما هو جديد عله يصبح كإمام هذا المسجد في الورع والتقى وحدث هذا الحوار :
________________________
عمر : عمو الشيخ عمو الشيخ ، ممكن أسألك حاجه ؟

الشيخ : إسأل ياحبيبي

عمر : هو أنا لو شوفت واحد صاحبي مسيحي وعيان ينفع أزوره ؟
ولو في مشكله ينفع أقف جنبه وأساعده ؟
وينفع أعزمه عندنا وهو يعزمني ؟ ولا حرام عشان هم مسيحيين ؟

الشيخ بإبتسامه هادءئة :
بص ياحبيبي
ربنا بيقول في سورة الممتحنه : {لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ } {إِنَّمَا يَنْهَاكُمُ اللَّهُ عَنِ الَّذِينَ قَاتَلُوكُمْ فِي الدِّينِ وَأَخْرَجُوكُم مِّن دِيَارِكُمْ وَظَاهَرُوا عَلَى إِخْرَاجِكُمْ أَن تَوَلَّوْهُمْ وَمَن يَتَوَلَّهُمْ فَأُوْلَئِكَ هُمُ الظَّالِمُونَ }الممتحنة 8 - 9
يعني إيه الكلام ده ؟
طالما صاحبك ده ما حاربكش في دينك وما طردكش من بيتك لازم وواجب عليك تعامله كويس وما تطلعش منك كلمه وحشه تجرحه وإلا هتسيء لدينك

عمر : يعني أنا لو ضايقت واحد مسيحي هبقى أسأت لديني ؟؟؟

الشيخ : طبعاً ، مش ربنا بيقول في سورة العنكبوت : {وَلَا تُجَادِلُوا أَهْلَ الْكِتَابِ إِلَّا بِالَّتِي هِيَ أَحْسَنُ إِلَّا الَّذِينَ ظَلَمُوا مِنْهُمْ وَقُولُوا آمَنَّا بِالَّذِي أُنزِلَ إِلَيْنَا وَأُنزِلَ إِلَيْكُمْ وَإِلَهُنَا وَإِلَهُكُمْ وَاحِدٌ وَنَحْنُ لَهُ مُسْلِمُونَ }العنكبوت46
يعني ربنا أمرك ما تكلموش إلا بالتي هي أحسن ، إلا بقى لو هي اللي إبتدى ظلم معاك .
وكمان ربنا بيقولنا إحنا كمسلمين : {وَلاَ تَسُبُّواْ الَّذِينَ يَدْعُونَ مِن دُونِ اللّهِ فَيَسُبُّواْ اللّهَ عَدْواً بِغَيْرِ عِلْمٍ { الأنعام 108

______________________________
______________________________
النتيجة : محمد وصاحبه المسيحي ضربوا بعض بفضل نصائح الشيخ العظيمة والمسلمين ولعوا في كنائس إمبابه ، عمر فضل ينصحهم .... بس محدش فاضي يسمعه لإنهم بيجاهدوا في سبيل الله وبيولعوا في الكنائس .

_____________________________
_____________________________
الفصل الثاني :
- الشيخ : إنت ما بتصليش ليه في الجامع اللي في الشارع اللي ورانا يا محمد ؟
محمد : ما أنا بصلي في الجامع اللي قدامنا عشان قريب .
الشيخ : لأ ، تعالي صلي في الجامع معانا وأنا أوعدك هتتبسط أوي ، ده الإمام بتاعه واحد من كبار الإخوان .
محمد : إخوان ؟؟؟؟
الشيخ : إنت ما تعرفش الإخوان المسلمين ؟ دول أكبر جماعه دعويه في مصر والعالم وبيعملوا خير وأكتر ناس بتوع ربنا ومنهم الدكاترة والمهندسين و و و ... ( وصلة مدح في الإخوان ) ، وعلى فكره يامحمد ، أنا مش إخوان بس عايزك تسمعلهم وهتتبسط أوي
يذهب محمد إلى مسجد " الإخوان " ويستمع إلى الدرس بعد الصلاة ليجد إمام المسجد يحدثهم عن بطل الإسلام الأوحد " حسن البنا " ويخبرهم كيف جاهد ليجعل مصر دولة مسلمه من جديد ويقنعهم إن منهج الإخوان هو منهج وسطي بلا تشدد ولا رجعيه ... إلخ إلخ

__________________________________
- الشيخ : إنت ما بتصليش ليه في الجامع اللي في الشارع اللي ورانا يا عمر ؟
عمر : ما أنا بصلي في الجامع اللي قدامنا عشان قريب .
الشيخ : لأ ، تعالي صلي في الجامع معانا وأنا أوعدك هتتبسط أوي ، ده الإمام بتاعه واحد من كبار أئمة السلف الصالح .
عمر : السلف ؟؟؟
الشيخ : إنت ما تعرفش السلفيين ولا إيه ؟ دول أكبر جماعه في مصر والعالم ، بتحاول تُحيي سنة الرسول عليه الصلاة والسلام ، بعيد عن البدع والشبهات ، وكمان إنت بتحب تنفذ سنة النبي والسلف الصالح ولا لأ ؟
عمر : أه طبعاً .
الشيخ : شوفت بقى ، طلعت سلفي أهو . هاهاهاها .

النتيجة : قسمنا المجتمع لإخوانجي وسلفي .
_________________________________
_________________________________
الفصل الثالث :
النهارده :

___________________
محمد : إنت متشدد .
عمر : إنت مبتدع
محمد : إنت متطنطع
عمر : وإنت محدث وتحتكم لغير ما أنزل الله
محمد : إنت بتكفرني ؟
عمر : القرآن اللي بيكفرك .... إلخ

مش عايزين نحكي بقى عن الليبراليين والعلمانيين والشيوعيين لإن محمد وعمر كده كده شايفينهم برة اللعبه وشيوخهم قالولهم إنهم داخلين النار يعني داخلين النار .
وحسبي الله ونعم الوكيل