شايل طيبة ما شايلها عزرائيل!!
وانة كَلبي ابد ما شالة آي دفان...
تسئل من علي؟ هو انة ما معروف؟
ساكن بالحضر ومعاشر المعدان..
كلبي ابيض لجن شايل حزن عاشور!!
نورس كَلبي وافترن علي غربان..
عمري زغير بس اسئل علي لشيوخ
من أكَبل عليه يكوملي الديوان...
ما احب الحزن بس حيل احب الناي..
من يعزف يشب..ويطفي بالنيران..
انة قاسي بقساوة ملكَة امي وياي..
من تجبل وتشبكَ بيدها الخوان..
افرح من اشوف العنب ما ينلاح..
خاطر ما يبوكَة الباكَ بالبستان...
من امشي برهاوة...الغيم مني يخاف
وعدوي بشوفتي يتوسل العميان.!!
بس كلش خجول واستحي من الماي
فشلة من السمة ويطيح بالتربان...
صح طبعي جبل بس بالتواضع صيت..
ما شايل خشم فد يوم عل الوديان..
صح اهوة الهدوء وساكت انة هواي..
بس من احجي صوتي يسمع الخرسان!!
ما همني اليخون يطيح من العين..
بس وسفة ينكَس طيبة الكيعان...
انة بروحي سجن وابطنة اظل محبوس..
وما اطلع رغم ما بالسجن سجان!!
انجويت بنار بس ما بينت محروكَ
بس خانتني ايدي وطلعت دخان.......
ما ابالغ ابد لو اكولن يجذبون.!!
على ذولة الحجيهم كلة بالحلفان..
على ذولة الحجيهم كلة بالحلفان.....