"وقل اعملوا فسيري الله عملكم ورسوله والمؤمنين"

صدق الله العظيم





الرســـــــــــالة

&

The message















( مسرحيه من فصل واحد )

تأليف د/ إســـلام زايـــد.

حقوق الطبع والنشر محفوظة ويحظر

النقل أو الاقتباس أو حتى التصوير إلا بموافقة المؤلف










مسرحيه( الرســــالة )

همسه الكاتب

أحيانا وفي لحظات انعدام الضمير يتحول هدف التعليم من التربية والإصلاح إلي اتجاه آخر نحو المادة والانحلال لذا فإننا يجب أن نقف وقفه حاسمه لنحاول أن نصلح فيها الفساد قبل أن ينتشر ويتحول إلي بقع يصعب علينا إزالتها وأن نحاربه بكافه السبل إن أمكن لكي نقضي عليه بقدر المستطاع هنا فقط نكون قد أدينا الرسالة.

بقلم د/ إســلام زايــد

الشخصيات

· ا/ خالد مدرس أول لغة عربيه وهو اجتماعي يحاول أن يصلح كل ما حوله من أخطاء.

· ا/ إسماعيل مدرس أول تاريخ وهو المسئول عن جدول توزيع الحصص علي المدرسين.

· ا/ يسري مدرس جغرافيا مهتم بالأبراج ويؤمن بها.

· ا/ حسن مدرس تربيه رياضيه.

· ا/ عبد الله مدرس حساب.

· ا/ مصطفى مدرس علوم.

( وهم غير مهتمين تماما بالمدرسة وكل اهتمامهم بالدروس الخصوصيه والماده فقط )

· ( علي وحازم ) وهم طالبان بالمدرسة.

المكان حجرة المدرسين بمدرسه ابتدائي.

الزمان أثناء اليوم الدراسي.

المشهد

( يرفع الستار علي حجرة المدرسين وهي عبارة عن ترابيزه وحولها مجموعه من الكراسي ليجلس عليها المدرسون وعلي الحائط لافتات " قم للمعلم وفيه التبجيلا كاد المعلم أن يكون رسولا " "مدرستي جميله ونظيفة ومتطورة" "أسرةالمدرسه ترحب بالمدير الجديد"

ثم يدخل الأستاذ خالد وفي يده مظروف يفتحه ليقراه ويظهر علي وجهه مشاعر الدهشة ثم يطوي الورقة ويضعها في جيبه وبمجرد أن يجلس علي احد الكراسي ويقوم بتصحيح بعض الكراسات يدخل الأستاذ عبد الله )

عبد الله/ ازيك يا أستاذ خالد أنت معندكش الحصة الرابعة النهارده ??

خالد/ لا كان عندي الأولي والثانية والثالثة ولسه باقي السادسة. بقلم د/ إســلام زايــد



( بمجرد أن يجلس الأستاذ عبد الله علي أحد الكراسي ويخرج ورقه وقلم وآله حاسبه ليجري بعض العمليات الحسابية يدخل الاستاذ إسماعيل وهو في حاله ضيق شديد ويمسك في يده جدول توزيع الحصص )

خالد/ مالك يا أستاذ إسماعيل زهقان ليه??

إسماعيل/ الأستاذ علاء مكنش راضي يدخل الحصة الرابعة احتياطي بدل الاستاذ عماد اللي غاب النهارده

خالد/ ومقلتليش ليه أخدها باله??

إسماعيل/ مخلاص يا أستاذ خالد خليته يوافق بس حلف يمين انه مش شارح حاجه

( يدخل الأستاذ حسن وهو يحمل كيس بلاستيك كبير به عدد من المشتريات (ملابس)

حسن/ ازيكم يا جماعه أنا جايبلكم النهارده شويه حاجات هتعجبكم (ويقوم بعرض بعض المشتريات فيقبل عليه زملائه بينما يعرض عنهم الأستاذ خالد ليكمل تصحيح الكراسات)

إسماعيل/ مفيش أخبار يا أستاذ خالد عن المدير الجديد??

خالد/ لسه وأصلني حالا…..

( يدخل الأستاذ يسري مسرعا وفي يده جريده يوميه )

يسري/ ( مقاطعا الأستاذ خالد ) أنا اللي عندي إخبار لسه طازه

عبد الله/ هات اللي عندك يا أستاذ يسري

يسري/ سمعت إن المدير الجديد هيشرف بكره وبيقولوا عليه كده إنه شديد حبتين

إسماعيل/خلاص يا جماعه لازم كلنا نحضر الطابور من بكره وكل مدرس يراجع شغله كويس مش عازين مصائب من أولها دول يومين وهيروحم لحالهم وأكيد اللي جاي زى اللي قابله

خالد/ انتم ليه مش عايزين تغيروا من نفسكم بجد??

إسماعيل/ وأنت مش عايز تريح نفسك وتريحنا معاك ليه??

خالد/ أريح نفسي ازاي وأنا شايف الغلط بيحصل قدامي!!

عبد الله/ أنت زعلان عشان إحنا بندي دروس خصوصية طب مجينا قلنا لك ادي معانا وأنت اللي رفضت والأستاذ حسن هوه اللي خد بدالك

خالد/ انتم عارفين مبدأي في الموضوع ده

يسري/ يبقي إيه اللي مزعلك مننا??

خالد/ أنا مش زعلان عشان بتدوا دروس خصوصية وأنا لا اللي مزعلني إنكم مبتشرحوش بضمير في الفصل زى الدرس

حسن/ وليه الغلط يا أستاذ خالد!!

خالد/ مش قاصدي يا جماعه أنا نفسي تهتموا بالمدرسة شويه وتدوها حقها زى الدرس

إسماعيل / وأنت شايفنا بنلعب في المدرسة ولا إيه!!

يسري / أنت باين ضميرك لسه بينقح عليك

خالد / هوه عشان بحاول أصلح الغلط يبقي ضميري بينقح عليه بقلم د/ إســلام زايــد

عبد الله / الطلبة همه اللي مش مهتمين نعملهم إيه نقتلهم

خالد / طالب الابتدائي دائما بياخذ المدرس قدوه ليه يعني لو كان المدرس مهتم هيبقي الطالب مهتم

يسري/ الحصة الرابعة باقي عليها كام يا أستاذ إسماعيل??

إسماعيل/( ينظر إلي ساعته ) باقي 10دقائق وعشان خاطرك نخليهم 1/2ساعه

خالد/ علي العموم المدير الجديد هيجي وعمره مهيكون زى اللي قابله وهيبقي ليه كلام تاني معاكم

يسري/ سنه5/2عليهم إيه الحصة الخامسة يا أستاذ إسماعيل??

إسماعيل/ عليهم (يبحث في الجدول) ألعاب مع الأستاذ حسن

يسري/ ممكن اخدهم بدالك الحصة دي يا أستاذ حسن اصل أنا عندي السادسة وعايز أروح العيال بدري

حسن/ ريحتني والله يا استاذ يسري بس ممكن تعدي علي الاستاذه الهام وتعرفها إني جبتلها البلوزه اللي طلبتها

يسري / والهام عندها فصل سنه كام لوقتي ??

خالد/ ريح نفسك تلاقيها روحت بعد الحصة الثانية

يسري / هوه أنت برج إيه يا أستاذ خالد??

خالد/ ( بسخرية ) برج الحوت

يسري/ حظك اليوم "لا تتدخل فيما لا يعنيك"

خالد/ وريني كده وأنت برج ايه يا أستاذ يسري ??

يسري / ( في فخر ) طبعا برج الدلو

خالد/ حظك اليوم "حاول إن تصلح من أخطائك في الحياة"

( يجذب يسري الجريدة بعنف من يد خالد )

خالد/ أنت زعلت ولا إيه!! ده جهل يا أستاذ يسري وحرام لما تؤمن بيه

يسري /جهل إيه يا أستاذ ده علم فلك

خالد/ طب خليك في علم الجغرافيا بتاعك وسيب علم الفلك في حاله

يسري / ومالها الجغرافيا بتعتي بقي يا أستاذ خالد??

خالد/ بسأل طالب في سنه خامسة عن السنة الكبيسة يرد يقولي دا السنة اللي بتكبس فيها الشمس علي الأرض والقمر وهما قاعدين مع بعض

يسري / أعمل إيه يا أستاذ خالد!! تفكيرهم كده أنا بحاول أبسطهم المعلومة بمثال العيال تأخذ المثال وتسيب المعلومة

خالد/طب يعني إيه سنه كبيسة يا أستاذ يسري

يسري/ أنا رايح علي حصتي يا أستاذ إسماعيل

حسن/ اوعي تنسي تدور علي الهام

خالد/مالك يا أستاذ عبد الله بتحسب في حسبه برما ولا إيه??

عبد الله / سيبني في حالي يا أستاذ خالد وبلاش تريقه

خالد/ هيه عصلجت معاك الشهر ده كمان?? بقلم د/ إســلام زايــد

عبد الله/ الدروس مبقتش جايبه همها تصور كان معايا خط بيزنس دلوقتي ماشي بكارت

خالد / عايز نصيحتي سيبك من الدروس وريح بالك

عبد الله/ اسيبها ازاي!! وأكل منين!!

خالد/ زي ما أنا عايش حلل مرتبك هوه صحيح شويه حبتين بس مكفيني

عبد الله / طب شوف حالي من حالك يا أستاذ عبد الله أنا عندي عربيه وأنت لسه بتركب مواصلات

خالد/ الموضوع مش حكاية فلوس وعربيه هيه حكاية ضمير وبس

عبد الله / أنا شكلي كده هروح علي حصتي أحسن زي الأستاذ يسري

حسن خدني معاك يا أستاذ عبد الله أروح أوزع شوية الحاجات دي

إسماعيل/ تفتكر إن المدير الجديد هيكون زي اللي قابله نضحك عليه بسندوتش وكوباية شاي

خالد/ معتقدش انه هيكون زي اللي قابله أبدا

إسماعيل/ اوعي تكون عارفه ومخبي

خالد/ ده إحساس خبره 23 سنه يا أستاذ إسماعيل

إسماعيل/ ( ينظر إلي ساعته ) ياه الحصة الرابعة خلصت أما أروح أوزع جدول الحصص

( يدخل الأستاذ مصطفي وفي يده سيجاره )

خالد/ إيه ده يا أستاذ مصطفي أنت كنت في الفصل بالسيجارة دي!!

مصطفي/ ايوه وفيها إيه يا أستاذ خالد??

خالد/ فيها إيه أنت كده بتعلم الأولاد الانحراف وأنا كلمتك في الموضوع ده اكتر من مره

مصطفي/ انحراف إيه يا أستاذ خالد اللي بتتكلم عليه?? دا أنا كنت بعلمهم الفرق بين الشهيق والزفير

خالد/ بالسيجارة يا أستاذ مصطفي!!

مصطفي/ أمال أعلمهم ازاي مش عشان الطلبة تفهم ولا أنا غلطان!!

( يدخل طالبان بالمدرسة علي وحازم )

علي/أستاذ خالد أستاذ خالد أنا شوفت علي بيشرب سجاير في دوره المياه

( يتجه الأستاذ مصطفي نحو حازم فيضربه فيبكي حازم )

مصطفي/ أنت مش داخل المدرسة غير بولي أمرك

خالد/ تعالي يا حازم أنت بتشرب سجائر ليه??

حازم/ مش عارف أنا لقيت الناس بتشربها ( ينظر إلي الأستاذ مصطفي )

علي/ اصل الأستاذ مصطفي بيشرب سجائر في الفصل

( ينظر إليه الأستاذ خالد في غيظ فيدير مصطفي وجهه )

خالد/ أنت مش عارف إن السجائر حرام وبتدمر صحتك وهتموتك لما تكبر ??

حازم/ وهو يبكي أنا آسف يا أستاذ مكنتش عارف كده

خالد/ خلاص أنت مش هتعمل كده ثاني ( يوميء حازم برأسه بالإيجاب )

خالد/وأنت والدك بيشتغل إيه?? بقلم د/ إســلام زايــد

حازم /والدي ووالدتي مسافرين بره

خالد/ وأنت عايش مع مين??

حازم/ لوحدي مع ستي

خالد/ طب روح علي حصتك دلوقت

(بمجرد أن ينصرف الطالبان )

خالد / شوف يا أستاذ مصطفي هيه دي القدوة الحسنه والتربية اللي إحنا بنربيها للطلبة

مصطفي / (في عناد) وأنا كنت ضربته وقلتله لازم تشرب سجائر

خالد/ أنا رايح أوزع الكراسات علي الطلبة قبل ميروحم

مصطفي/ ( بعد أن يخرج الأستاذ خالد) وأنا كان هدفي أعلمهم وإنما الأعمال بالنيات

( يدخل الأستاذ يسري وخلفه الأستاذ عبد الله والأستاذ حسن والأستاذ إسماعيل مسرعين وكل منهم يمسك بموبايله )

عبد الله / أنا وصلتني رساله حالا من المدير الجديد وبيقول انه عارف إني عندي عربيه

مصطفي / ودا عارف إني بشرب سجائر في الفصل

يسري / وكمان عارف إني مهتم بالأبراج

حسن /وأنا عارف بالملابس اللي ببعهالكم

إسماعيل/ يعني كلنا وصلتنا رسائل من المدير الجديد وهوه عارف عننا كل حاجه

( يدخل الأستاذ خالد مقاطعا حديثهم )

خالد/ بس أنا موصلتنيش أي رسالة علي موبايلي الجديد

إسماعيل/ ( ينظر إلي خالد في شك) في حد وصله كل حاجه عننا ليه مصلحه في كده واداله أرقام موبيلاتنا

خالد/ قصدك إيه يا أستاذ إسماعيل

إسماعيل / أنت اللي وصلت له أخبارنا يا أستاذ خالد

خالد/ مش أنا اللي وصلت له لأنه هوة عارف كل حاجه عنكم

( ينظر كل منهم للأخر في دهشة ممزوجة بالحيرة والشك )

خالد/ لان أنا المدير الجديد

(جميع المدرسين في وقت واحد…. أنت !! )

خالد/ ايوه أنا لسه واصل المنشور النهارده وأنا اللي بعت رسالة لكل واحد عشان يحاول يصلح من أخطاءه وهديكم فرصه أخيره وبعدها نتحاسب كلنا عشان ميتساواش اللي يتعب مع اللي مبيتعبش وكل واحد ياخد حقه

جميع المدرسين / ( في أسي ) يعني منديش دروس خصوصية

خالد/ الدروس الخصوصية زى مقلتلكم مش موضوعي لأنها خلاص انتشرت بينا زى المرض وأصبح من المستحيل إننا نتخلص منها مره واحده أنا كل اللي يهمني أنا المدرسة ترجع قدسيتها واحترامها وتفضل دايما منارة للعلم ولما كل ده يتحقق يبقي كلنا عملنا اللي علينا وادينا رسالة لكل الأجيال

ينزل الستار مع أغنيه

( أجيال وري أجيال هتعيش علي حلمنا واللي يقوله اليوم محسوب علي عمرنا ) بقلم د/ إســلام زايــد [/FRAME]







__________________