لأن متأكده من بخت السواعد



شفت اسمك كلت يمكن اجه العيد
واجيت ابسرعه اسجل والله شاهد

ماضل منتدى ينشر اناشيد
منك اله بيه تلكاني كاعد

وجيت اهناه لكيتك والأجاويد
كلهم طَيبين ابكلب واحد

مثل فرحة طفل صبحية العيد
فرحتي بيك من شفت القصايد

بس انته عفتني وعندي تأكيد
يمكن هاي اشاره اتريد اباعد!

وانته ابن الأصل ما ظنتي اتحيد
عن عرف الكرام اولا تعاند!

اليجي خطار ميسئلونه شتريد!
إذا ما ضل ثلث تيام كاعد!

وعفت خطارك انته ورايح ابعيد
باول يوم اشوفنك تباعد!!

أريد امشي القبيلتكم ولا اهيد
ابخت كلمن فريضه اهناك اناشد

وَاكللهم احكموا يا أجاويد
ابنكم عاف خطاره ايتشاهد

ويكلولك عَملتك هاي متفيد
لأن متأكده من بخت السواعد

بقلمي

مريم17



---------------------------
الرد من العملاق حسين الساعدي


رائعه يا مريم
قصيدة بقمة الروعه
موزونه وبقافيتين وحقيقة شي ررررررررائع

وخل انشوف قصتك مع ولدنه العافج وانتي خطاره شنو عذره!
ههههههههههههه


اجيتي للسواعد صايحه ادخيل
وصلتي السلف ما بايع ضَميره

والضيف اليجينه انقبله تقبيل
ونفرشله الكلبقبل الحصيره

عَشيرتنه أبد ما تقبل اتعيل
وهاي السالفه كلش جبيره

وإذا تثبت وَلدنه هَدلج الحيل
هسه انطرده من كل العشيره

حَقج ما يضيع ابهل تَعاميل
ولا مات البخت بالعنده غيره

بس احجيلنه ابكل التفاصيل
وَلدنه وين عافاج ابجزيره !

لو بالمنتدى ابصفحة مراسيل
وكتبلج بالشعر ومضه قصيره!

يمكن عنده شغله وصار تعجيل
غصب سافر ابساعات الضهيره!

خل نتصل بَلكت عنده تعليل!!
ليش ايعوف ضيفه ابهيجي حيره!

وَلدنه ايكول فَكر يمشي بالليل
طلع وبسرعته إوما أخذ خيره!!

مشه للحله وبدرب المحاويل
إوبالسياره طباله ابحَفيره

وهسه بالطواري ايصيح ياويل
وايده امجبره ورجله كَسيره

ويكول الخاطرج لمن سرع حيل
راد ايجب ورده الهل ضفيره


الشاعر
حسين الساعدي
منقوول