ماطكينة صورة ويه المشاهير
اخذنه ويه المكابر صورة تذكار

هشام ..الجيبة خالي وكلبة متروس
شمسوي الفقير؟؟وينطلب ثار

فقرة وينكتل كدامنه العيد
مثل مقتل سمية كبال عمار

يشم انفاسنه ومايعزف الناي
لأن حتى الهوى البصدورنه ايجار

ونشوف الدنيا أضعف من خصر خيط
صغيره الدنيا ؟؟مدري عيونّه صغار

ندور العافية ابين التداريج
ومسية العافيه تمر بينه خطار

ويلومونه البعض من نبجي وانّوح
وحسرتنه عله اهلنه تنشف الاهوار

الماضاكت اجدامه حرورة الكاع
مايدري ابكلبها شسوت النار

مامرّه جرحنه احساس عنكود
العنب مو حامض ..احنه جفوفنه كصار

وعلى السفرة تحط يمنه العصافير
ملوحة زادنه مغزره ويه الاشجار

اذا يطلع عدو....نشمر ورا ماي
مانعرف نكض بجفوفنه حجار

ولا كضينة تفكة.....وعشنة حرااس
الحمامه شكد بريئة... وحرست الغار

ما وسخنه جفنه بدوسة زناد
ولا ثكلنة شفه بجلمة الثار

من كدما نظيفة كلوبنه وبيض
الحمام الأبيض من كلوبنه يغار

أمّنه وشمرنه اسرارنه ابّير
وطلع بالبير يوسف طش الاسرار

من عدها وقفلنه الروح والباب
وكعدنه بغرفه ظلمة بآخر الدار..

للشاعر سيف الحلفي