هلوووز


شلونكمش ؟ اخباركمش ؟


يلة نبدي بالسالفة
احم احم




هاي القصة لوليام شكسبير الفسكان .. شفت انه لازم تنشرح باللهجة المحلية (العامية) حتى تترسخ القصة بالمخيخ ويفتهم الطالب اللي هو ((دجة بالانكلوزو) والي خابص العالم يكول بس الميرجنت مدمرني بس الميرجنت صعب (هو شيرادله )
..

ففكرنه انه لازم اندخل هاي القصة بالدماغ عن طريق شرحها باللغة العامية
طبعا القصة متصورة على شكل فلم واحنه اخذنه القصة من الفلم اكثر من الموجود بالمنهج .. فراح تشوفون عبارات دارجة بحياتنه اليومية.. لإضافة الحس الفكاهي على الموضوع وحتى القلق النفسي الي يراقف الطالب هم يخف هع .. بس بشرط بسيط ان الموضوع للنصب والشقه يعني من تحفظة وتكتبه نصا
بالامتحان.. حتى يركعوك بصفر وانت الممنون..



هاي جانت المقدمة، هسه نجي نحجي القصة,,,




انتونيو (طبعا كاتليني مدري ليش يسموه انطونيو بدل انتونيو ) المهم هو يمثل الخير: انتونيو جان فد واحد غني وابن ناس معروف حباب جانت الاوادم تحبه لان هو خوش زلمه.. يتعامل زين وينطي ديون للناس بدون فوائد بوكت الضيق..
صديقه اللي هو عزيز عليه اسمه (بسانيو) الي هو ولد حليو كل بنات المنطقة كاتلين نفسهم عليه.. عنده خط (زين.. اثير سابقا) مفتاح واحد وموبايل صرصور تك باب وماطور ايراني اربعة گير.
چان انتونيو يحب بسانيو وشوكت ميضوج بس يباوع بچهرة بسانيو تروح الضوجة تکول شاف انجلينا جولي
.
بسانيو: ابوه انطاكم عمرة فچان عنده كم فلس حوسمهم بسانيو وصرفهن بكارتات بعد الـ12 بالليل وسفرة لسوريا ويعني تفلسهن منا ومنا.. وطاح حظة حدق.. فشوكت مچان يعوز فلوس چان يروح للمگرود انتونيو يداين وانتونيو لأن
خوش زلمه مچان يريده.. (لو هيچي بشر لو متنراد )..



(شايلوك) الي يمثل الشر: شايلوك مكروه العالم كلها تكرها يعني الله گالب چهرته مسوي قرد هندي وفوگاها يهودي. هذا شايلوك چان واحد قفـاص اكشر ينطي فلوس للناس بفوائد كلش چبيرة بحيث صار لغاف مو تبيعي ولا واحد يوگفه يبوگ ويرجع ليوره وسوه الثروة مالته بالحواسم.
شايلوك چان يكره انتونيو.. لأن چان انتونيو ينطي فليسات للناس بدون فوائد عكس شايلوك فچان يكرهه كلش هوايه وثاني شي چان انتونيو كلما يشوف چهرتة يرگعه بتفله بگصته وهو الممنون
.
سولاريو وسولانيو ولورينزو وكراشيانو: بس لو افتهم منين يخلفون هل اسماء: المهم چانوا اصدقاء انتونيو فد يوم من الأيام دخلوا سولاريو وسولانيو على انتونيو شافوه مگلوبة چهرته ومعبس وقافل من الرئيسي ميتحاچه فعبالهم الأخ واگع بالحب وهو بگد الترمز، شکول حب.. هذا حب شمس هواية عليه..
لو عبالهم هو خايف على السفن مالته تگول مشغل بهبهانات على طريق سوريافحاولوا يواسوه و اجه کراشيانو ولورينزو.. گلوله امشي خل نروح للشلال نشرب نرگيلة .. عصير بطيخ، مقبل .. گلوله خليها على الله وداعت خالتك ماكو شي يسوة.. هم ما راتاح.
چان يطب بسانيو تگول طبت عليه هيفا .. چان هذا ينفرد وجهة.



فد يوم من الايام بسانيو راد فلوس من انتونيو (فد 3000 دولار) حتى يكدر ينافس خطابة پورشيا.
انتونيو المگرود خطيه مچان عنده فلوس بوكتها دازه بشغل بالسفن مالته.. فگله روح للناس البره واداين منهم وگللهم على انتونيو كضمان
.
بعدين انتونيو اقترح گال نروح نداين شايلوك 3000 دولار الي يحتاجهن بسانيو..
فراحوله الثنين وطبوله .. الله يساعدك شايلوك
شايلوك: لا هلا ولا مرحبا .,, شجابكم


شايلوك: سولفلي شتردون؟
انتونيو: شوف شايلوك.. احنه جايين نريد نداين منك 3000 دولار منا لـ3 اشهر.. واني مسؤول انطيك شگد تريد فوائد.
شايلوك: انت شايفيداين 3000$ متگلي صايرة دايرة..
انتونيو: هسه نريد منك 3000 دولار تنطينه لو نولي؟
شايلوك: گال ويه نفسه: بشرفي فرصة اجتي لحلگك شايلوك..ولازم انتقم لنفسي فگال:
شوفوا اني اريد اصير صديق ماريد عدو بس عندي شروط:
اول شي: اني ما اريد منكم فوائد.. وثاني شي: اذا المحروس انتونيو مرجع الفلوس بعد 3 اشهر . اخذلي كيلو لحم من جسمه (اي ادري قابل لحم شرح لو مثروم) المهم.. چان انتونيو يگول يمعود صدگ چذب اصلا هاي فد شي بسيط من فلوسي منا لـ3 اشهر مية شغلة تصير ولا محتاج لهذا العقد الفاشل مالتك.
بسانيو باگ هوه گال هذا يريد يأذي انتونيو بس انتونيو گله لتهتم .. دخذ الفلوس وفضني وروح اخطب المحروسة.



بورشيا: أميرة مدينة بيلمونت
بورشيا چانت فد حاتة كلش حلوة وكلش صاكه.. احلى البنات، احلى من هيفا، چانت تستخدم (كلين اند كلير) كل يوم وواقي مال شمس.. وسبتاج يعني طالعة تخبل ومنزلة البرجم على عيوننهة ومسويه شعرهة ستيبس .. يعني صدق تخبل..
نيريسا: الخدامة مالت بورشيا الحلوة.
بورشيا چانت تعبانه ولعبانه نفسها من الدنيا كلها لأنها خطيه متگدر تختار الزوج اللي تحبه وترفض اللي متريده.
لأن ابوها المرحوم حط وصية قبل ما الله ياخذ امانته.. الوصية مالته عبارة عن خطة يانصيب هاي الخطة تساعد پورشيا حتى تتزوج الانسان المناسب.. (خوش بطة تلعب شناو)
الخطة عبارة عن 3 صناديق سفن كوفة، كل صندوق عبارة عن لون معين (ذهبي وفضي ورصاص) بوحده من هذني الصناديق صورة بورشيا ووحدة بيها لفة فلافل ووحدة بيها بطل سفن حجم عائلي ابو اللترين.
فوگ هذا القهر چان حاط شرطين للي يريد يلعب باليانصيب.
الأولى: لازم يقسم بالمعتقدات ويسطر 12 امام انه بعد ميتزوج ولا وحده بحياته اذا مطلعتله صورة بورشيا (لايرحم ولايخلي رحمة الله تنزل).
الثانية: اللي يقبل بالخطة لازم يوافق على هاي الشروط.. واذا ميعجبة يطبه مرض.



اجوي 5 يخطبون بورشيا، فگالت بورشيا لنيرسا بورح عمتچ رديلي اسمائهم من جديد.
الاول: امير نابولي، كالت هذا اربع وعشرين ساعة يحجي على الحصونة (تكول مفتح معرض يبيع بيها مارك وبطة ودولفين)
الثاني: كونت البلانتاين، گالت هذا طول الوكت معبس ومگلوبة چهرتة ميفيد حتى ميضحك.
الثالث: اللورد الفرنسي، گالت هذا كلشي بيه بس مابيه شي (ما افتهمت بصراحة) ادري شنو البيه حتى مابيه .. يلا مشيها.
الرابع: بارون بريطانيا، گالت هذا ميعرف يحچي جلفي واني ما اعرف احچي مثلة شون راح نتفاهم بربچ؟
الخامس: الصغير الألماني، گالت أكتل نفسي ولا يتزوجني واحد چنـه اسفنجة شفاطة.
نيريسا گالت: شوفي حبيبتي الجماعة الخمسة قرروا يفلتون لأن ولا واحد قبل بوصية ابوچ الگشرة ، چان بورشيا تفرح يعني شوية ارتاحت.
فنيريسا گالت: بورشيا شنو رأيچ ابسانيو؟.. گالت فدوة لحلگچ، هو هذا اللي يستاهل وحدة مثلي.. تگول توم كروز إجه عليها.



أمير المغرب
امير المغرب اجه حتى يطلب ايد بورشيا.. چان وياه مجموعة (حماية) كلها بيكيسيات bkc ورشاشات وحتى سونار مال تفجيرات وچانوا لابسين كلهم ابيض، (لأن كلهم مستخدمين تايد للغسيل.. مفيش مستحييييل).
چان طويل چنه دنگه اسمر يعني مفحم چان عنده نظرة حادة مثل فد واحد شجاع الواحد يحچيها لله، وگللها شوفي عيني بورشيا، لاتخترعين من چهرتي لأن الشمس سمطتني سمط بس الله يدري بيه.
بس مشكلته مچان يدري بشغلة اليانصيب فخطية انسطر وماعت روحة فجابتله بورشيا مي ورشت على وجهه، چان يگوم على حيله ويطلع سيفه وجره چان يگول شوفي بورشيا هذا السيف ماكو واحد ما صار عليه ورجعه عايش لو ميت لو عاهة مستديمة يعني اني مستعد اسويلچ كلشي بس بروح أبوچ الا الوصيلة الگشرة وگام يبچي.
چان تگله يمعود ابو الشباب هذا ابوية ميت اتريد اخالف وصيته شلون ترضاها انت ميصير. اخير شي قبل وگال امري لله وين الطريق للصناديق خل نجرب وگالتله بشروط ابوها گال فوگاها هم ميت وهم فوگاها يتشرطگلتله
گام يباوع على 3 صناديق وضل صافن شي ربع ساعه شيختار گال هسه اني شمدوخ نفسي اختار الذهي لأن هي بورشيا ذهب. چان متطلع الصورة وطلعتله كتابة تگله (عمت عينك وطيح الله حظك وحظ النفضك على هل اختيار العاوي) فگام الأمير ودمعته على خده گللها اني رح اضل متمسك بوعدي وبشرط ابوچ.. وچان گال لجماعته يلا نرجع لبيتنا.



لونسيلوت كوبو
لونسيلوت چان يشتغل خدام ابيت شايلوك،، ب.. طگت روحة,. ففكر ان يعوف البيت ويعوف خدمتة لشايلوك،، فگعد يحاچي نفسه
مثل المخابيل اعوفه لو ما اعوفه ؟
(خو الزملك وردة وشلع باوراقهة .. شكد شافط لخاطر الله )



الشيطان مالته يگله يمعود روح ولي شلـك بهل العيشه الطايح حظها.. وضميره الثاني يگله لا ابقه مهما يكون هذا چان معيشك ابيته، فچان دايخ وضايج من الدنيا لأن چان قرار صعب.. بعدين راح حاچه ابوه اللي چان اعمى فگلـه شوف وليدي شايلوك فد واحد تعبان وعاوي شلـك بهل العيشه الگشرة عوفه وروح ويه بسانيو هذا خوش وليد حباب..
فراح على بسانيو گلـه الله يساعدك استاذ بسانيو، ردتك بخدمة، اني عفت شايلوك واريد اخدمك الك، چان يگله بسانيو بالله گول لي ليش تريد تعوف واحد غني وتجي على واحد حافي محدق ؟ گلـه هذاك الله منطيه فلوس بس الله منطيك الشرف (اي على اساس شلون فيل يلعب اتاري).
چان يگلـه روح لشايلوك وودعه واخذ فلوسك وگله خل يجي للحفلة مالتي بالليل وتعال هلا بيك.
بنفس الوقت بسانيو چان يريد يروح لبيلمونت، فإجه كراشيانو وگلـه بسانيو حباب اخذني وياك حتى لو سحل بالدراجة، گلـه ولك انت واحد عاوي وتدور بنات تروح تخربط كلشي، چان گلـه والحمزو ما اخربط بس انت خليني اجي وياك بعدين بسانيو قبل وگلـه يلا تعال.