وحش كلش زماني وياي يماي
بشر يمي ولاحس بيه يماي
صرت عطشان وآنه بنهر يم ماي
واحس حتى النهر عطشان ميه
((أمي))
أمي اكبر من عجايب هلزمان
أگدر أني اليوم أوصفهه نبي
أمي وكت الخوف تصبحلي أمان
امي بالطوفان تصبح مركبي
الله تحت اجدامهه خله الجنان
ويعني اطب الجنة لو هيه تبي
الله هو يگول مو أني ال أگول
هيچي علمني كتابي ومذهبي
أني من عدهه اشربت كاس الحنان
مات أبوي وهيه صارتلي أبي
أمي نهر يفيض من عدهه الامان
غطت بحبهه اخوية وصاحبي
أمي من ابرد تصير گبالي نار
أمي تطلع شمس تضوي بمغربي
أمي ماتسترهه جبة ولاعباه
أمي تلبس حتى تسترعلعبي
علمتني شلون امشي ومااميل
وابقه افخر في جدودي ونسبي
أمي ماعلمتني أطوّل شعري يوم
ولا أصبّغ خدي والگط حاجبي
علمتني الوطن اغله من الحياة
ومن يعوز بيوم اعرف واجبي
ومن يصير ازماط اچهب علصعاب
ايصير چتف الموت گاعي وملعبي
أمي وصتني احب كل العراق
أمي عگدت راية الله بشاربي
اتگول حط ايدك ييمه بأيد اخوك
ولا تحطهه بيوم بأيد الاجنبي
امي رحمة والله نزلهه امان
وأني بس رضاهه صاير مطلبي
ولذلك أني ماازعلهه يوم
ول...يزعّل أمه يعني اكبر غبي
أمي اگصرمني أني شوي طويل
حيل اخجل اذا توگف جانبي
خاف تحچي وياي رگبتهه تميل
وهذا مرفوض بسلوكي وأدبي
أمي لونادتلي أدنگلهه بخشوع
والله مااستر أگوم أحبي حبي
والله مااستر أگوم أحبي حبي
بقلمي
حاتم الهاشمي
rwd]m Hld
موضوع: قصيدة أمي 
