ميثم الاسدي شبح النت
المدير العام
عدد المساهمات : 2598
تاريخ التسجيل : 20/07/2013
 |  موضوع: احبك الجمعة أغسطس 02, 2013 4:35 pm | |
| أحبك حب ولا موجود بين الناس
أحبك حب ولا موجود بين الناس
حب ما بيه أبد اي غايه شخصية
مو حب غريزة وينتهي كل ليل
ولا حب مال عندك وبيه أنه مغرور
أحبك وقليلة بحقك وما توصف البيه
شاكتبلك بعد وشاحجي عن حبي
حب ما توصفه أبيات شعرية
كَلبي بحبك فرح وانولد من جديد
مثل طفل ويتيم وانطوه عيديه
ومثل شجره وكَتلها العطش بالصحرء
وكبل ما تيبس عليها مطرت الدنيا
احبك موت يالي من صدك تنحب
يأبو كَلب الجبير الكله وفه وحنيه
وبأبو عيون الوسيعة وتمتلك نظرات سحرية
أعمى عليك مر فتح وكال
يابني عليك عيون مو طبيعية
وبشفتك سر لان ما ثابت اللون
شفتك مرة حمرة ومرة وردية
وخدودك هذن لو واحة ورود
لان اشتم عطر وردات جورية
ما أقنع أبد ولا أصدك أنا بهاي
إنته انخلقت من تربة طينية
يَ الحسنك درس صعبة أمتحن بيه
تدري شكد درجتي صفر من ميه
ويَ الحتى الشعر دايخ وحاير بيك
عجزت بوصفك أوزانه وقوافيه
وأحسد نفسي من دون كل الناس
رسلك ربي الي أجمل هدية
| |
|
