منتديات عراقنا الادبية

مستوره جانت دمعتي!!
حسين الساعدي

اهنا يمن جنه وجنت نلعب سوى ابمرجوحه
مستوره جانت دمعتي ومنك صفت مَفضوحه
ثارات أطلبك بالزغر
لو بس يرد بينه العمر

يل تارك الروح ابقهر
منك بقت مجروحه

مستوره جانت دمعتي وهسه صفت مَفضوحه

لاكيتني وما سلمت بس لا صِدك ناسيني!
ياوسفه جَنك ضَيعت عشك الزغر و اسنيني!
اعذرني لو ما سولفت سبكتني دمعة عيني
تتذكر اشكد اللعب
نومنه من بعد التعب

وعنكود صوباط العنب
اشكد حاولينه انلوحه

وهنا يمن جنه وجنت نلعب سوى ابمرجوحه
مستوره جانت دمعتي وهسه صفت مَفضوحه

حَسبت كلشي وما أظن تنكر محبتك ياولف!
وقصة هوانه امن الزغر سالوفه وبكل السلف
كلبك ولا حن للعرف بس كلبي من شافك رجف

اِتذكر سوالفنه الكضت
رجعني لايام المضت

والروح احسنهه صفت
فوك الارض مطروحه

وهنا يمن جنه وجنت نلعب سوى ابمرجوحه
مستوره جانت دمعتي وهسه صفت مَفضوحه

الشاعر حسين الساعدي

منقوول

@حنين اللقاء@ ,آمــــإﺳـــيـے ✿ معجبون بهذا

منتديات عراقنا الادبية

منتدى الشعر الشعبي

حسين الساعدي-واهنا يمن جنه وجنت!